Mamlakatimizda foydalanilmayotgan yoki samarasiz ishlatilayotgan davlat mulklarini iqtisodiy muomalaga kiritish, xususiy sektor ulushini kengaytirish hamda aholi va tadbirkorlar uchun teng imkoniyatlar yaratishga alohida e’tibor qaratilmoqda.

Xususan, davlat mulklarini sotish va ijaraga berish jarayonlari elektron onlayn-auksionlar orqali amalga oshirilmoqda. Bu esa barcha ishtirokchilar uchun shaffoflik va teng raqobat sharoitlarini ta’minlamoqda.

Mazkur qarorlar ijrosi Farg‘ona viloyatida ham izchil amalga oshirilmoqda. Jumladan, viloyat hududida joylashgan bo‘sh turgan va kam foydalanilayotgan davlat mulki obyektlari bosqichma-bosqich inventarizatsiyadan o‘tkazilib, ularni sotish yoki ijaraga berish bo‘yicha aniq chora-tadbirlar belgilanmoqda.

Shuningdek, davlat mulklarini ijaraga berish bo‘yicha belgilangan tartib-taomillar aholining huquqiy xabardorligini oshirishga xizmat qilmoqda. Mulk qiymati, undan foydalanish shartlari hamda tomonlarning huquq va majburiyatlari oldindan aniq belgilanishi fuqarolar va tadbirkorlar uchun qulaylik yaratmoqda.

Xulosa qilib aytganda, davlat mulklarini realizatsiya qilish va xususiylashtirishga oid qarorlar iqtisodiyotda ochiqlik, qonuniylik va samaradorlikni ta’minlashga qaratilgan bo‘lib, ularning izchil ijrosi Farg‘ona viloyati hududlarining ijtimoiy-iqtisodiy rivoji hamda aholi farovonligini oshirishda muhim ahamiyat kasb etmoqda.