1. Бош сахифа
2. Янгиликлар

Фарғона шаҳрида болажонларнинг хатна тўйлари ўтказилди

×

Бугун Фарғона шаҳридаги "Кўксарой" тантаналар мажмуасида "Баҳор" маҳалла фуқаролар йиғинидаги боқувчисини йўқотган, ижтимоий ҳимояга муҳтож, кам таъминланган оилаларнинг 11 нафар фарзандларининг хатна тўйлари шаҳар ҳокимлиги ва саховатпеша тадбиркорлар томонидан ўтказиб берилди.

Наврўз умумхалқ байрами муносабати билан ташкилланган тадбирда вилоят ва шаҳар ҳокимликлари вакиллари, секторлар раҳбарлари, маҳалла фуқаролар йиғинлари ходимлари ҳамда тўй болаларнинг оила аъзолари иштирок этишди.

Юртимизда ҳар бир оила, ҳар бир бола бахтли бўлиши учун халқчил ислоҳотлар амалга оширилмоқда. Тантананинг очилиш маросимида шаҳар ҳокими Восилжон Назаров ҳамда маҳалла ва нуронийларни қўллаб-қувватлаш бошқармаси бошлиғи Баҳодиржон Холиқовлар сўзга чиқишиб тўй болаларга Ватан корига ярайдиган камарбаста инсонлар бўлишларини тиладилар.

Тадбир давомида болажонларга тўёна сифатида совғалар улашилди. Тантанали шодиёна жажжигина ўғлонлар хотирасида яхшилик, меҳр ва саховат, шу билан биргаликда Ватанга бўлган муҳаббат рамзи сифатида бир умрга муҳрланиб, уларни ҳамиша хайрли ишларга ундаб туришига ишонамиз.

Тўй маросимида вилоятимиздаги хушовоз хонандалар томонидан куй-қўшиқлар ижро этилди. Болажонлар оила аъзолари билан биргаликда рақсга тушиб маданий ҳордиқ чиқардилар. 

Фарғона шаҳар ҳокимлиги Ахборот хизмати