1. Бош сахифа
2. Янгиликлар

Эҳтиёжманд оилаларга эътибор кўрсатилмоқда

Президентимизнинг топшириғига биноан Фарғона шаҳридаги ижтимоий ҳимояга муҳтож оилаларга моддий ёрдам кўрсатилмоқда.

Бу эзгу ишлар айниқса, муборак байрам Қурбон ҳайити муносабати билан вилоятнинг барча ҳудудлари бўйлаб, кенг қулоч ёйди.

Шаҳар ҳокими Ҳамиджон Ҳабибиддинов, шаҳар прокурори Адҳамжон Маматалиев ва бошқа сектор раҳбарлари иштирокида “Темир дафтар”га киритилган 3157 та оилага бир миллион сўмдан нақд пул тарқатилди. Бундан ташқари шаҳардаги эҳтиёжманд оилаларга озиқ-овқат маҳсулотлари топширилди.

– Президентимизга минг раҳмат, – дейди Д.Маҳмудова. – Доимо биздек оилаларга қўлдан келганча ёрдам беришяпти. Кеча вилоят ҳокимлиги вакиллари дори-дармонлар жамланмасини олиб келди. Бугунги мана бу кўмак ҳам бизни жуда хурсанд қилди.

Оғир кунларда инсонга далда бўлиш, озгина эътибор кўрсатишдан эзгу амал йўқ аслида. Қурбон ҳайити кунларида мамлакатимиздаги эҳтиёжманд оилаларга кўрсатилаётган эътибор барчани мамнун этмоқда.

Шунингдек, Фарғона вилояти ҳокимининг топшириғи билан бугун Фарғона шаҳридаги 870 та оилага 21 турдаги вирусга қарши, иммунитетни оширувчи ва бирламчи дори-дармонлар ва тиббий буюмлар тарқатилди.

Хонадаонларда шундай оила вакиллари билан халқ депутатлари Фарғона шаҳар кенгаши депутатлари суҳбатда бўлиб, дори-дармон тўпламини етказиб беришди.

– Бундай хайрли ишда иштирок этганимдан мамнунман, – дейди шаҳар Кенгаши депутати, 2-сон оилавий поликлиника мудири Ш.Сиддиқова. – Хонадонларда фуқаролар билан юзма-юз гаплашиб, дарҳақиқат бундай ёрдам ўз вақтида амалга оширилаётганини тушундим.